ദോഹ/റിയാദ്: ഗൾഫ് സഹകരണ കൗൺസിൽ (ജി.സി.സി) അംഗരാജ്യങ്ങൾക്കിടയിൽ സുരക്ഷാ ഏകോപനവും സംയോജനവും തുടരേണ്ടതിന്റെ പ്രാധാന്യം ഊന്നിപ്പറഞ്ഞ് ഖത്തർ. സൗദി അറേബ്യയിലെ റിയാദിലുള്ള ജി.സി.സി ജനറൽ സെക്രട്ടേറിയറ്റ് ആസ്ഥാനത്ത് നടന്ന അംഗരാജ്യങ്ങളിലെ ആഭ്യന്തര മന്ത്രിമാരുടെ അടിയന്തര യോഗത്തിലാണ് ഖത്തർ നിലപാട് വ്യക്തമാക്കിയത്.
ആഭ്യന്തര മന്ത്രിയും ആഭ്യന്തര സുരക്ഷാ സേന (ലഖ്‌വിയ) കമാൻഡറുമായ ഷെയ്ഖ് ഖലീഫ ബിൻ ഹമദ് ബിൻ ഖലീഫ അൽതാനിക്ക് വേണ്ടി ആഭ്യന്തര മന്ത്രാലയം സഹമന്ത്രി ഷെയ്ഖ് അബ്ദുൽ അസീസ് ബിൻ ഫൈസൽ ബിൻ മുഹമ്മദ് അൽതാനിയാണ് ഖത്തർ പ്രതിനിധി സംഘത്തെ നയിച്ചത്.മേഖലയിലെ സുരക്ഷാ വെല്ലുവിളികളെ നേരിടുന്നതിനും പ്രാദേശിക സ്ഥിരത ഉറപ്പാക്കുന്നതിനും സംയുക്ത ഗൾഫ് സുരക്ഷാ സഹകരണം ശക്തിപ്പെടുത്തുന്നതിനുള്ള വഴികൾ യോഗം ചർച്ച ചെയ്തു.പുതിയ സാഹചര്യങ്ങൾക്കും പൊതുവായ വെല്ലുവിളികൾക്കും അനുസൃതമായി അംഗരാജ്യങ്ങൾക്കിടയിലുള്ള സുരക്ഷാ ഏകോപനവും പരസ്പര സഹകരണവും വർദ്ധിപ്പിക്കേണ്ടതിന്റെ അത്യാവശ്യം ഖത്തർ യോഗത്തിൽ ചൂണ്ടിക്കാട്ടി.ഗൾഫ് മേഖലയുടെ സുരക്ഷയും സമാധാനവും നിലനിർത്തുന്നതിനായി യോജിച്ചുള്ള പ്രവർത്തനങ്ങൾക്ക് യോഗം ഊന്നൽ നൽകി.
മേഖലയിലെ മാറുന്ന സാഹചര്യങ്ങളിൽ ജി.സി.സി രാജ്യങ്ങൾക്കിടയിലുള്ള ഐക്യവും സുരക്ഷാപരമായ കരുതലും കൂടുതൽ കരുത്തുറ്റതാക്കാൻ ഈ യോഗം ലക്ഷ്യമിടുന്നു.
